Naglab-ot na sa 543,000 ka Overseas Filipino Workers (OFWs) ang nakagamit sang OFW Lounges sa NAIA Terminal 1 kag Terminal 3 halin sang ini ginbuksan sang nagligad nga tuig, suno sa Overseas Workers Welfare Administration (OWWA).
Sa karon, ginabanta nga 1,300 ka OFWs ang nagamit sang lounge sa NAIA Terminal 1 kada adlaw, samtang 1,200 naman sa Terminal 3.
Bukas ang mga lounge 24/7, kag nagatanyag sang pahuwayan, locker para sa mga gamit, cellphone charging stations, kag libre nga meryenda kag ilimnon. Agud makagamit sang pasilidad, kinahanglan lang magpakita sang passport kag iban pa nga nagakaigo nga dokumento.
Ginalauman nga sa pagsulod sang Pebrero, maglab-ot sa 600,000 ang total nga OFWs nga makabenepisyo sa OFW Lounges. Padayon nga ginatuyo sang gobyerno nga maghatag sang mas komportable nga serbisyo para sa aton mga modernong bayani.