Photo by RMN News
Kadungan sang mock elections sa Pilipinas, madinalag-on nga natigayon ang pilot testing sang Online Voting and Counting System (OVCS) sa Singapore sa pagpanguna sang Commission on Elections (COMELEC) kag Embahada sang Pilipinas sa Singapore.
Ang mga empleyado sang embahada ang nagserbe electoral board members matapos sila mag-agi sa madalom nga technical training antes ang mock election. Nagpatigayon man sang training ang mga miyembro sang Special Board of Election Inspectors (SBEI) kag Special Board of Canvassers (SBOC) sa paggamit sang OVCS kag automated canvassing process.
Sa ginpatigayon nga testing, pinili nga mga rehistrado nga overseas voters sa Singapore ang nagpartisipar sa exercise, nga nag-agi sa bug-os nga proseso halin sa online enrollment, voter identity verification, test kag actual voting, tubtob sa paggamit sang OVCS kiosk.
Ginpabutyag ni Philippine Ambassador to Singapore Medardo G. Macaraig ang iya kalipay sa positibo nga resulta sang pilot testing kag ang iya pagsalig nga mataas ang voter turnout sa masunod nga eleksyon.
Ang Singapore ang ikaduha nga may pinakadamo nga overseas voters sa Asia-Pacific region, gani diri ginpatigayon ang una nga pilot testing sang online voting and counting system para sa overseas voting. Ginalauman sang COMELEC nga ini nga inisyatibo magahatag sang mas moderno kag mas accessible nga pamaagi sa pagbotar para sa mga Pilipino nga ara sa abroad.
