CBL Bus, Taxi, kag Jeep Nagbunggoanay sa Sta. Barbara, Isa Patay

By: Reynold Arca

STA. BARBARA, ILOILO – Isa ang napatay matapos magbunggoanay ang tatlo ka salakyan – isa ka bus, isa ka taxi, kag isa ka jeep sa Brgy. Bolong Este, Sta. Barbara, Iloilo subong nga aga, Pebrero 3, 2025.

Suno sa inisyal nga impormasyon, ang insidente natabo pasado alas-singko sang aga sang ang taxi nagbunggo sa Calinog Bus Line (CBL), nga nagresulta sa pagbunggo man sang bus sa Janiuay nga jeep.

Nakilala ang driver sang bus nga si Agusto Latoza, 49 anyos, nga residente sang Lambunao, samtang si Ryan Bandiola, 38 anyos, gikan sa Brgy. Danao, City Proper, amo ang nagamaneho sang jeep.

Base sa imbestigasyon sang Sta. Barbara Municipal Police Station, ginpahayag nga nagahanda kuntani mag-uturn ang CBL bus sa direksyon sang munisipyo sang Sta. Barbara sang gulpi lang nga may nagdalagan nga taxi nga nabunggo sa bus. Bangud sang impact, naapektohan ang jeep nga nagapadulong sa pareho nga direksyon, kag naigo ang isa ka pasahero nga nagakabit sa jeep, upod ang duha pa ka sakay.

Photos by Rhea Le Jaruda

Samtang nagapadayon ang retrieval operation, ang driver sang taxi padayon man nga ginabuligan bangud sang pagkaipit sa sulod sang iya salakyan. Sa inisyal nga pagpangusisa, ginkumpirma nga patay na ang isa ka pasahero nga nagakabit sa jeep bangud sang natabo nga aksidente.